7gun.org xəbər verir ki, Aktualxeber.az-a daxil olan məlumatlarda Bakı İqtisadiyyat və Humanitar Kollecinin direktoru təhsil ocağını rüşvət yuvasına çevirməkdə ittiham edilir.

Belə ki, kollecin direktoru Rüxsarə Əliyeva bu təhsil ocağını market kimi idarə edir. Kollecdə hər şey direktorun “qiymət tas”ından asılıdır. Yəni, tələbələrdən toplanan pulların məbləği bazar məzənnələri ilə tənzimlənir.

R.Əliyevanın tələbələrdən müxtəlif adlar altında pul toplanması adi hal alıb. Dərsə gəlməyin və gəlməməyin öz qiymətləri var. İmtahanlar zamanı əlin cibində olmasa növbəti kursa keçmək üçün heç bir şansın yoxdur.

Bundan əlavə, kollecdə “ölü ştatlar” var. R.Əliyevanın qohum-əqrəbasının, dost-tanışının bir çoxunun adı kollecdə gedir. Hər ay onlar üçün dövlət büdcəsindən maaş ödənilir və kollecdə bu şəxsləri tanımırlar. Nəticədə büdcə vəsaitləri talanır, müxtəlif adlar altında mənimsənilir.

7gun.org xəbər verir ki, Aktualxeber.az- a məlumat verən mənbənin dediyinə görə kollec direktoru tələbələrdən alınan pulları bacısının əliylə toplayır. Bacısı isə kollecin koridorunda gəzməklə duruma nəzarət edir və alış-veriş işlərini reallaşdırır. Səhərdən axşama qədər əlində çanta ilə koridorda dolaşan sözügedən şəxsin Bakı İqtisadiyyat və Humanitar Kollecində işləməməsi isə bir ayrı mətləbdir.

Kollecin direktoru Rüxsarə Əliyeva Təhsil Nazirliyindən buraya transfer olunduqdan sonra qaydalarla yanaşı, durum da dəyişib. Məlumatda deyilir ki, xanım Əliyeva təhsil naziri ilə yola getməsə də, hansısa sirli əllər onu direktor postunda saxlayır. Həmin «sehirli əl» isə nəinki onu himayə edir, həm də bir sıra qanunsuzluqlara imza atmasını sığortalamaqla da məşğul olur. O da vurğulanır ki, kollecin direktorunun digər qazancı müəllimlərdən aylıq almasıdır. Onlar hər ay Rüxsarə Əliyevanı «görmək»lə işlərinə davam edir və kimsəni saya salmırlar. Amma xanım Əliyevanın bir başqa gəlir yeri də var.

İddia olunur ki, direktorun şəxsi maraqları təmin olunduğundan kollecdə adı gedən, lakin özü məktəbin yolunu belə tanımayan 10-dan artıq müəllim də mövcuddur. Əslində, nazir Rüxsarə Əliyevanı bu yerə “sürgün edib”. Onun bir səhvini taparaq, işdən çıxarmaq üçün də fürsət axtarır ki, bunun gec-tez baş verəcəyi isə istisna deyil».

Bakı İqtisadiyyat və Humanitar Kollecində qəbuldan tutmuş, imtahanda qiymətlərin yazılmasına qədər hər şey pulladır. Təsəvvür edin ki, bir vaxtlar direktor süpürgəçi Fazilə xanımın maaşını mənimsəyib. Rüxsarə Əliyevanın belə işləri çoxdur. Lakin ona qarşı hər hansı bir tədbir görülmür. Təhsil Nazirliyinin baş verənlərə loyal münasibəti bir çox hallarda isə, susqunluğu müəllim adına xələl gətirən ünsirlərin əl-qol açmasına münbit şərait yaradır.

Xırdalan şəhərində yerləşən Bakı Dövlət İqtisadiyyat və Humanitar Kollecində baş verənlərlə bağlı daxil olan məlumatlara diqqət yetirərkən bir çox xoşagəlməz halların bu tədris-təhsil müəssisəsində də cərəyan etdiyinin şahidi olursan. Mənbəmiz deyir ki, bu proseslərdə iqtisadiyyat və humanitar şöbələrinin müdirləri xüsusilə seçilir. Semest və dövlət imtahanlarının müxtəlif məbləğlərdə pulların tələb olunması kollecdə adi hala çevrilib. Pul yığımı kompaniyası o qədər geniş vüsət alıb ki, bu proseslərə tədris hissə işləri üzrə direktor müavini İradə xanım, Həmkarlar İttifaqının sədri Tamara Rüstəmova da cəlb olunublar.

Kollecdə baş verənləri tam nəzarətdə saxlamaq üçün Rüxsarə Əliyeva daha da irəli gedəcək bacısı Sədaqət xanımı və qardaşı Elxanı ümumi nəzarət üçün yanına gətirib. Direktorun qardaşı Elxan kadrlar və mühasibatlıq şöbəsinin işinə nəzarəti tam əlinə götürüb. Sədaqət xanım isə pul yığımı kompaniyasında həm iştirak edir, həm də ümumi prosseslərə nəzarət edir.

Diqqət cəlb edən məqamlardan biri də kollec direktoru Rüxsarə Əliyevanın ad günü münasibətilə müəllimlərdən pul toplamasıdır. Ümidvarıq ki, bu yazımızdan sonra əlaqədar qurumlar lazımi tədbirlər görəcəkdir.

Mövzuya qayıdacağıq və qarşı tərəfi də dinləməyə hazırıq.