Bir neçə gün öncə mətbuatda “Giyaslı Group” gecə Bakının mərkəzində ağacları kəsməsi və yerində bina tikməsi barədə məlumat verilmişdi. Bildirilmiçdi ki, Neftçilər metrosu yaxınlığında, 61 saylı məktəbin yanında köhnə yaşayış binasını söküb yerində yenidən bina tikmək istəyiblər. Ancaq, ərazidə olan çoxlu sayda ağaclar işlərin aparılmasına maneə törədir. Buna görə də şirkətin rəhbəriliyi lazımi yerlərin xeyir-duasını alandan sonra ağacları kəsdirib.

Məsələ ilə bağlı Fövqəladə Hallar Nazirliyinə, Ekologiya və Təbii Sərvətlər Nazirliyinə, rayon icra hakimiyyətinə və digər yerlərə müraciət olunsa da, lakin səlahiyyətli şəxslərdən heç kim əraziyə gəlməyib. Belə bir məlumat var ki, “Giyaslı Group”un rəhbərliyini hansısa yüksək çinli məmur himayə edir. Elə buna görə də həmin şirkətin rəhbəriliyinə "gözün üstə qaşın var" deyən yoxdur. Hətta həmin şirkətin vergidən və digər dövlət ödənişlərindən yayındığı, tikdiyi binaların standartlara cavab vermədiyi deyilir. Maraqlıdır ki, “Giyaslı Group”un rəhbərliyinə bu qədər geniş imkan yaradan həmin o məmur kimdir? Yəni, şirkət rəhbərliyi kimə arxayın olub "meydan sulayır"? Hazırda bu və digər məsələlərlə bağlı araşdırmalarımız davam edir.

Qeyd edək ki, agacları kəsən şirkətlə bağlı açıq mənbələrdə hər hansı bir məlumata rast gəlinmir. Reyestr sənədlərindən məlum olur ki, “GİYASLI GROUP” MMC 2017-ci ilin oktyabrın 26-də qeydiyyatdan keçib. 2020-ci ilin yanvarın 22-də isə reyestr sənədlərinə dəyişiklik olunub. 10 manat nizamnamə kapitalına malik şirkətin hüquqi ünvanı Nərimanov rayonu, Etibar Qocayev, ev 26-dır. Şirkətin qanuni təmsilçisi isə Hacıbala Soltan oğlu Abasovdur.

Sözugedən ünvanda daha bir şirkət 7 Oktyabr 2022-ci ildə qeydiyyatdan keçib. 10 manat ilkin kapitala malik “SMART HOME CONSTRUCTİON” MMC-nin qanuni təmsilçisi Qiyaslı Tural Fərhad oğludur.

Mövzunu davam etdirəcəyik.