Masallının sabiq deputatı, biznesmen və oliqarx kimi tanınan Nəriman Əliyev dövlət üçün ciddi problemə çevrilib.


O, Azərbaycan dövlətinə meydan oxuyur desək, təəssüf ki, yanılmarıq. Böyük obyektlər və biznes şəbəkəsinə sahib olan Nəriman Əliyevlə bağlı şikayət və ilginc informasiyalar zaman-zaman yayılıb.

Düzdür, ölkənin hər yerində böyük obyektlər vergidən və digər dövlət ödənişlərindən yayınır. Bu hallar Cənub bölgəsində çox yayğındır və səbəbləri də çoxlarına bəllidir.

Deyilənə görə, 6 saylı Ərazi Vergilər Baş İdarəsinin rəhbər şəxsləri obyektlərdən aylıq haqq alırlaraq, onların vergidən və digər dövlət ödənişlərindən yayınmalarına şərait yaradırlar. Bu fakt isə indinin mövzusu deyil, çoxdan hər kəsin diqqətini cəlb edib və mediada da işıqlandırılıb.

Sabiq deputat Nəriman Əliyevə gəlincə, onun Masallı ərazisində fəaliyyət göstərən tikinti materialları bazarında da yuxarıda qeyd edilən qanunsuzlar yaşanır.

Bildirilir ki, Əliyev hələ deputat olanda belə işlərlə məşğul olub. Amma ona "gözün üstə qaşın var" deyə olmayıb.

Səbəbi isə onun keçmiş milli təhlükəsizlik naziri Eldar Mahmudovla ciddi əlaqələrinin olması idi. Elə buna görə də, necə deyərlər, Nəriman Əliyevin qılıncının qabağı da kəsib, dalı da.

Amma Masallı sakinləri onu heç də xatırlamırlar, çünki saxta mandatla parlamentdə oturan bu şəxs ancaq özünü, yaxınlarını və biznesini düşünüb. Onu heç bir Masallı sakinin problemi maraqlandırmayıb.

Hələ bir neçə ay əvvəl jurnalistlərdən biri sosial mediada canlı yayımda Nəriman Əliyevin ölkəyə müxtəlif yollarla psixotrop maddələri gətirməkdə ittiham edirdi. Onun dərman biznesinə də əl qoyduğu iddia olunurdu. Amma nədənsə bu deyilənlər "qulaqardı"na vuruldu, heç kəs Nəriman Əliyevi sorğu-sual etmədi.

Heç jurnalistin dediklərini Nəriman Əliyev özü dəç təkzib etmədi. Yəni mediaya belə sayğısızlıq nümayiş etdirdi, "Burda mənəm, Bağdadda kor xəlifə" kimi özünü apardı.

Statistikaya nəzər salaq, son illərdə ölkədə ailələrin dağılması sürətlə artır. Burada sosial-iqtisadi amillərlə yanaşı, narkotik vasitələrdən istifadə halları da qeyd olunur.

Biz iddia etmirik ki, belədir. Amma bir jurnalist canlı açaraq belə bir iddia səsləndirirsə, Nəriman Əliyev niyə susur? Niyə bu iddialara cavab vermir?

Əslində, belə qanunsuzluqlar edənlərə görə həm də cəmiyyət günahkardır. Əgər Nəriman Əliyev kimiləri vaxtında tənbeh olunsaydı, xalqa bu qədər sayğısızlıq nümayiş etdirməzdilər.

Bəs Nəriman Əliyev necə oldu ki, gedib Eldar Mahmudovun əsas adamlarından birinə çevrildi? Bu suallara yaxın günlərdə qayıdacağıq.

Aygün