Sentyabrın 11-də Yasamal Rayon Məhkəməsi Ruslan Əmirliyə 30 sutka inzibati həbs cəzası verib. O, İnzibati Xətalar Məcəlləsinin 510 (xırda xuliqanlıq) və 535.1 (polisə tabe olmamaq) maddələri ilə təqsirli bilinib. 7gun.org xəbər verir ki, bu barədə Turan-a AXCP-dən fəalın vəkilinə istinadən bildiriblər.

Polisin məlumatına görə, "Əmirli küçədə ünvansız söyüş söyüb, polis əməkdaşları ona irad tutarkən tabe olmayıb".

Əmirli ittihamları rədd edərək bildirib ki, bacısının müalicə olunduğu Milli Onkologiya Mərkəzinin binasından çıxarkən onu mülki geyimli şəxslər saxlayıblar.

Müdafiə tərəfi saxlanma yerində videomüşahidə kamerasındakı qeydlərə baxılması və şahidlərin çağırılması barədə vəsatət qaldırıb. Lakin məhkəmə vəsatəti təmin etməyib. Müdafiə tərəfi apellyasiya verəcək.

AXCP fəalları məhkəmə zalına buraxılmayıb. Polis qüvvələri onları məhkəmə binasının yanında sıxışdırıblar. AXCP fəalı Təzəxan Mirələmlini bərk itələyiblər, o yıxılaraq xəsarət alıb.