Azərbaycanda ən ciddi və təhlükəli problemlərdən biri də yol nəqliyyat hadisələridir. Təsadüfi deyil ki, bunu "yol terroru" adlandırırlar.

Əgər dəqiq araşdırma aparılsa, heç şübhəsiz bəlli olacaq ki, yol qəzalarında ölən və xəsarət alanların sayı rəsmi statistika deyilənlərdən daha çoxdur.

Bunun səbəbi də hər kəsə aydındır, çünki imtahan-qeydiyyat şöbələrində insanların sürücülük təcrübəsinin olub-olmadığı qətiyyən maraqlı deyil. Bazar və alver təfəkkürü o həddə çatıb ki, tələb edilən məbləği, yəni rüşvəti verib asanlıqla sürücülük vəsiqəsi almaq və sükan arxasında oturmaq olur.

Təcrübəsiz sürücülər isə potensial qatillərdir ki, onlar insanların həyatı ilə asanlıqla oyun-oynaya bilirlər. Biz burada günahı sürücülərin üzərinə atmaq niyyətində deyilik, söhbət vəsiqə bazarına şərait yaradan və baş vermiş hadisələrdə məsuliyyət daşıyan məmurlardan gedir, təbii ki...

Məsələn, indi istənilən MERO-da sürücülük vəsiqəsi almaq üçün ən aşağı qiymət 1200 manatdan başlayır. MERO rəisləri də heç kimdən və heç nədən qorxmadan açıq-aşkar şəkildə pul yığımı ilə məşğul olurlar. Bəs bu günə qədər hansısa MERO rəisi və ya ən kiçik əməkdaşı rüşvət aldığı üçün cəzalandırılıbmı? Xeyr, əksinə, onlar daha irəli çəkiliblər, baxmayaraq ki, bununla bağlı mediada kifəyət qədər mötəbər və təkzibolunmaz faktlar yayılıb.

Amma bu sahədən yazmaq da asan deyil, çünki istənilən an üstünü qara buludlar ala bilər.

İndi isə gələk özbaşınalığa rəvac verən daha bir məmura. Bu, Baş Dövlət Yol Polisi İdarəsinin 4 saylı rayonlararası qeydiyyat-imtahan və texniki baxış şöbəsinin rəisi Ana Cəfərovdur. Bəzi hallarda yeni rəis kimi təqdim edilən Anar Cəfərov təxminən 2021-ci ilin may-iyun aylarında bu vəzifəyə təyin edilib. Əslində elə də çox vaxt da deyil. Ancaq o, bu qısa illər ərzində pul alış-veriş işlərində çox böyük təcrübə qazanıb. Digər MERO-larda olduğu kimi Anar Cəfərovun rəhbərlik etdiyi Baş Dövlət Yol Polisi İdarəsinin 4 Saylı rayonlararası qeydiyyat-imtahan və texniki baxış şöbəsi də "açıq bazar" prinsipi ilə işləyir. Burada hər bir şeyin öz qiyməti var, həm də dəyişməz və konkret.

Əgər istənilən zaman orada kənardan müşahidə aparılsa, aydın görünəcək ki, MERO bazardan heç nə ilə fərqlənmir. Bəs bunu aidiyyəti dövlət orqanları görmürlər? Əlbəttə, görürlər! Heç şübhəsiz ki, bu deyilənlər də ciddi cəhdlə şablon sözlərlə təkzib ediləcək. Amma fakt faktlığında qalır...

Bəzi məlumatlara görə, Anar Cəfərov hər ay bu "bazardan" nə az-nə çox, hardasa 300-350 min manat pul qazanır. Digər MERO rəislərinin də qazancı heç də bundan az deyil. Təsəvvür edirsiniz? Gördüyünüz rəqəm sizə fantastik görünə bilər. Ancaq bu bir reallıqdır. Bunu ölkədə çox az adam olar ki, bilməsin. MERO-da təkcə sürücülük vəsiqələri satılmır ki... Burada o qədər gəlirli işlər var.

7GÜN XƏBƏR-ə daxil olan məlumata görə, Anar Cəfərov da bəzi məmurlar kimi sərvətini "qara-qura" yollarla xarici ölkələrə daşıyır. Çünki nə vaxtsa, hər şeyinin əlindən alınacağını da anlayır. Bilir ki, xalqdan oğurlanmış və talan edilmiş vəsait heç kəsə qismət olmayıb, gec-tez fələyin çarxı çönüb onu da sərvəti ilə birgə qəhr edəcək.

Bizi izləməyi unutmayın, çünki problem düşündüyünüzdən də dərindir, çalışacağıq ki, zamanla aydınlaşdıraq...