Qəbul zamanı icra başçısını tənqid edən Məhəmməd Böyükkişiyev həbsini sifarişli sayır

Goranboy sakini, rayonda sahibkarlıq fəaliyyətilə məşğul olan 68 yaşlı Məhəmməd Böyükkişiyev 8 aydır ki, həbsdədir. 10 gün əvvəl Goranboy Rayon Məhkəməsinin hakimi Taleh Mustafayev ona 2 il həbs cəzası kəsilməsi barədə hökm çıxarıb.

Lakin sahibkarın özü də, yaxınları da bildirir ki, bu hökm əsassızdır. Məhəmməd Böyukkişiyev deyir ki, Goranboy Rayon İcra Hakimiyyətinin başçısı Məhərrəm Quliyevin sifarişi ilə həbs olunub. Onun sözlərinə görə, səbəb Goranboyun Qızılhacılı qəsəbəsindəki şadlıq evində keçirilən vətəndaş qəbulunda icra başçısına iradlar bildirməsi olub.

“Onlara dedim ki, qoçusunuz?”

“O görüşdə başqa rayonların da rəhbər şəxsləri iştirak edirdi. 1000 nəfərə yaxın adam vardı. Orada dedim ki, Prezident hərənizə 3000 manatdan yuxarı maaş verir ki, xalqa xidmət edəsiniz, siz isə xalqı saymırsınız. Hətta həmin vaxt Qızılhacılı qəsəbəsi üzrə icra nümayəndəsi Elnur və icra başçısının müavini, işçiləri mənimlə qəbul keçirənlər arasında sədd çəkdilər. Buna etiraz elədim. Onlara dedim ki, “qoçusunuz?” Orada Qızılhacılı bələdiyyəsinin sədrinin əməllərindən, mənim başıma açdığı oyunlardan, torpağı əlimdən alıb, pula görə başqasına verməsindən danışdım”, – Məhəmməd Böyükkişiyev Goranboyda öz məhkəməsində bunları danışıb.

Yaxınları Meydan TV-yə danışır ki, Məhəmməd Böyükkişiyev icra başçısının bu qəbulundan bir gün sonra – martın 13-də saxlanılıb. İddia olunub ki, 68 yaşlı sahibkar torpaqla bağlı mübahisəyə görə Qızılhacılı bələdiyyəsinin binasında bələdiyyə sədri Səbinə Həsənovanı təhqir edib, stulu qoluna vurub, masanın üstündəki kitab-dəftəri, əşyaları dağıdıb.

Ona qarşı Cinayət Məcəlləsinin 188.3 (kənd təsərrüfatı təyinatlı torpaq üzərində mülkiyyət, istifadə və ya icarə hüququnu pozma) və 221.3 (silah qismində əşyadan istifadə etməklə xuliqanlıq) maddələrilə ittiham irəli sürülüb.

Məhəmməd Böyükkişiyev isə bildirir ki, bu ittihamlar əsassızdır. Yaxınlarının dediyinə görə, o, uzun müddət torpaq problemilə əlaqədar şikayət edib, lakin tədbir görülməyib. Bu üzdən martın 12-də icra başçısının vətəndaşlarla görüşündə ona kəskin şəkildə iradını bildirib, bələdiyyə sədri haqqında həqiqətləri çatdırıb. Ertəsi gün də prokurorluğa şikayətə gedəndə elə oradan polislər tutub aparıblar:

“Bələdiyyənin sədrinin qanunsuz hərəkətlərindən şikayət eləmək üçün Goranboy Rayon Prokurorluğuna gedib, prokurorla görüşmək istəyib. Bir az sonra prokurorluğun binasına polislər gəlib, onu tutub, şöbəyə aparıblar”.

“Dəfələrlə bələdiyyəyə müraciət etdi”

Torpaq probleminin konkret nədən ibarət olmasına gəlincə, ailə üzvləri deyir ki, Məhəmməd Böyükkişiyev 2018-ci ildə hərrac yolu ilə Qızılhacılı bələdiyyəsinə məxsus 2,8 hektar torpaq sahəsini alsa da, indiyədək ondan istifadə edə bilmir. Bununla əlaqədar keçmiş bələdiyyə sədrinə çoxsaylı müraciətləri nəticəsiz qalmışdı. Yeni sədr Səbinə Həsənovaya müraciətlər də nəticə verməyib. Bu səbəbdən Əmlak Məsələləri Dövlət Xidmətinin 7 saylı yerli ərazi idarəsinə üz tutub. Bu idarəyə müraciətindən sonra həmin idarənin əməkdaşları gəlib torpaq sahəsini ölçüblər. Məlum olub ki, “Qarağaclıq” zolağına düşdüyü üçün ona başqa yerdən torpaq sahəsi verilməlidir.

“Bununla əlaqədar dəfələrlə Qızılhacılı bələdiyyəsinin sədrinə müraciət elədi. Yenə də cavab verilmədi. Yəni yeni torpaq sahəsi verilməsi məsələsindən xəbər çıxmadı. Bir daha Əmlak Məsələləri Dövlət Xidmətinin 7 saylı ərazi idarəsinə üz tutdu, yenə oradan əməkdaşlar gəldi. Qızılhacılı bələdiyyəsinin mülkiyətinə aid 1,20 hektar torpaq sahəsinin ona verilməsi ilə bağlı dönmə nöqtələrini müəyyənləşdirdilər, akt tərtib elədilər. Bundan sonra, məlum oldu ki, həmin torpaq sahəsini başqa şəxs istifadə edir. Yenə də dəfələrlə bələdiyyəyə müraciət etdi…”, – ailə üzvləri deyib.

Bələdiyyə sədri Səbinə Həsənova isə məhkəmədə zərərçəkmiş qismində ifadə verərkən deyib ki, Məhəmməd Böyükkişiyevlə ədavəti, düşmənçiliyi yoxdur. Onun sözlərinə görə, sahibkar müxtəlif dövlət orqanlarına daim haqsız şikayətlər göndərirdi.

Bələdiyyə sədri iddia edib ki, Məhəmməd Böyükkişiyev martın 12-də icra başçısının vətəndaşlarla görüşü zamanı davranışı ilə orada iştirak edən şəxslərə qarşı hörmətsizlik edib.

O vurğulayıb ki, təqsirləndirilən sahibkar gəlib bələdiyyə binasındakı otağında masanın üstündəkiləri dağıdıb, özünə də xəsarət yetirib, nalayiq ifadələr işlədib. Buna baxmayaraq, ondan şikayətçi deyil və yüngül cəza verilməsini istəyir.

Hökumət də sahibkarın hüquqlarının pozulduğunu etiraf edib

7GÜN XƏBƏR-in məlumatına görə, Məhəmməd Böyükkişiyevin vəkili Zabil Qəhrəmanov Meydan TV-yə bildirib ki, müvəkkilinin 2 il azadlıqdan məhrum edilməsi barədə Goranboy Rayon Məhkəməsinin hökmünü ədalətsiz və əsassız hesab edir. Hökmdən apelyasiya şikayəti verəcək:

“Cinayət işinin materiallarında Məhəmməd Böyükkişiyevin təqsirsizliyini təsdiqləyən kifayət qədər faktlar var. Təkcə elə telefon zənglərini təhlil eləmək kifayət idi”.

Məhəmməd Böyükkişiyevə məxsus ikimərtəbəli ticarət obyektinin məhkəmə qərarı olmadan və kompensasiya ödənilmədən sökülməsilə əlaqədar da bir neçə ildir ki, onunla icra hakimiyyəti arasında çəkişmə gedib. O, mülkiyyət hüququnun pozuntusu ilə əlaqədar Avropa İnsan Hüquqları Məhkəməsinə şikayət etmişdi. Həbsdə olduğu dövrdə – sentyabrda məlum olub ki, Azərbaycan hökuməti ərizəçiyə münasibətdə ədalətli araşdırma hüququnun pozuntusunu tanıyıb və işə yenidən baxılması barədə üzərinə öhdəlik götürüb. Həmçinin mənəvi zərərə görə 3600 avro, hüquqi yardıma görə 500 avro kompensasiya təklif edib.

“Pozuntu açıq-aşkar olanda üzv dövlət onu məhkəmədə mübahisələndirmir, yenidən baxılması barədə öhdəlik götürür. Sevindirici haldır ki, Azərbaycan höküməti də şikayətlərə baxılmasında bu metoda keçir. Ümid edək ki, işə təkrar baxılması formal olmayacaq”, – sahibkarın Avropa Məhkəməsində vəkili olmuş Əsabəli Mustafayev bildirib.

Tarix: 31.10.2024