Azərbaycanda səhiyyə sahəsində korrupsiya, yanlış idarəetmə və özbaşınalıqlar demək olar ki, zaman-zaman müzakirə olunur, amma təəssüf ki, çıxış yolu tapılmır. Ölkənin səhiyyə sistemi faktiki olaraq üç nazirliyin – Səhiyyə Nazirliyi, TƏBİB, İcbari Tibbi Sığorta Dövlət Agentliyinin əlində girinc qalıb. Səhiyyə sisteminin yanlış idarəetməsi elə bir vəziyyət yaradıb ki, son illərin bu sahədə ən uğurlu islahatı sayılan sığorta sistemi iflic hala gəlib.

Sığorta sisteminin məqsədli, müxtəlif bəhanələrlə iflic edilməsi isə bir daha göstərir ki, Azərbaycan səhiyyəsi Afrikanın cəngəllik qanunları ilə idarə olunur. Sığorta sistemindən müxtəlif bəhanələrlə yayınan tibb ocaqlarından biri isə Azərbaycan Tibb Universitetinin Tədris Cərrahiyyə Klinikasıdır. Bu tibb müəssisəsi ilə bağlı şikayətlər demək olar ki, hər gün artır.

Azərbaycan Tibb Universiteti Tədris Cərrahiyyə Klinikası İcbari Tibbi Sığorta üzrə Dövlət Agentliyinin müavilə bağladığı tibb müəssisələri arasında olsa da, Gəray Gəraybəyli sözün həqiqi mənasında “köhnə bazara təzə nırx” qoyub.

7GÜN XƏBƏR-in məlumatına görə AzToday.az-a danışan vətəndaşlar deyirlər ki, göndərişlə Tədris Cərrahiyyə Klinikasına göndərilsələr də, onları dəfələrlə orada süni yollarla əlavə xərcə salıblar, müxtəlif analizləri sığorta paketinə aid etmədən onları soyublar. Bəzən isə hətta məlumatsız xəstələrə bu əməliyyat sığortaya düşmür deyə külli miqdarda pul alıblar. Bütün bu maneə və əngəllərin isə məhz Gəraybəylinin tapşırığı əsasında yaradıldığına şübhə yoxdur.

Bundan başqa, həkimlər buraya müraciət edən xəstələrə tibbi sığorta üçün heç bir göndəriş vermirlər. Hazırda Tədris Cərrahiyyə Klinikasında müalicə olunan xəstə yaxını deyir ki, onlardan bir həftə ərzində təkcə analizlərə və müayinəyə 470 manat pul alınıb, hələ əməliyyat üçün da 2800 manat ödəməlidirlər. Xəstə həkimlərdən isə icbari tibbi sığortaya göndəriş ala bilməyib. Çünki belə olan halda həkim ona xəstəyə baxmayacağını, başqa həkimə və ya xəstəxanaya müraciət etməsini tövsiyə edib.

Şikayət etmək istəyən xəstələrə isə “gedin Gəray Gəraybəyli ilə danışın” cavabı verilir. “Faktiki Tibb Universiteti Tədris Cərrahiyyə Klinikası Sovet dövrünün kolxoz qaydaları ilə idarə olunur, Gəray Gəraybəyli isə məhz bu kolxozun sədridir. Faktiki “pripiska” ilə məşğuldurlar. Bu adamların vətən, millət, insan anlayışları yoxdur, rüşvət bunların da qanına hopub”, – xəstə yaxını belə deyib.

Şikayətlərlə bağlı Azərbaycan Tibb Universitetinin rektoru Gəray Gəraybəyli ilə əlaqə saxlamaq olmayıb. Klinikanın rəsmi saytında isə direktor və baş həkim bölmələrində buranı kimin idarə etməsi əksini tapmayıb, yəni nə direktor var, nə baş həkim…

Səhiyyə Nazirliyi, TƏBİB isə burada baş verən rəzalətə susmaqda israrlıdır.