Və ya GƏNCƏ ŞƏRABININ GİZLİ FƏSADLARI

“Gəncə Şərab-2” Açıq Səhmdar Cəmiyyətinin istehsal etdiyi məhsulların insan orqanizminə ciddi təhlükə törətdiyi ilə bağlı 7GÜN TV-yə məlumat daxil olub. Mənbə qeyd edir ki, zavodun istehsal etdiyi spirtli içkilər (şərab və araqlar) normativ aktlara cavab vermir və onlara insan orqanizminə ciddi təhlükə törədə bilən bir sıra qatqılar əlavə edilir. Bu barədə əlaqədar təşkilatlar- Səhiyyə Nazirliyi, Qida Təhlükəsizliyi Agentliyi və digər rəsmi orqanlar məlumatlandırılsa da, təəssüf ki, hələ də təsirli tədbirlər görülməyib. Yaxud, “Gəncə Şərab-2” ASC-nin rəhbərliyinə “yüngülvari” xəbərdarlıq edilmiş olsa da, müəssisəyə rəbərlik edən Namiq Məmmədov öz “kimyagərliyini” uğurla davam etdirməkdədir.

( Yeri gəlmişkən, mənbə xatırladır ki, “Gəncə Şərab -2” ASC – nin rəhbəri Namiq Məmmədovun adı keçmiş Təhlükəsizlik naziri Eldar Mahmudovla yanaşı hallandırılır. Bu barədə daxil olan məlumatlar bir daha araşdırılır).

Araşdırmalardan məlum olur ki, zavodda istehsal olunan “Banketnaya”, “Zolotoye koltso”, “Bars” araqların, “Medovka” və “İvanovka” kimi şərabların keyfiyyəti nəyə görə hədsiz dərəcədə aşağıdır sualına zavod rəhbərliyi bildirib ki, onların istehsal etdiyi məhsullara daxil edilən spirti Ukraynadan gətirirlər. Lakin, son aylar regionda baş verən hadisələrin fonunda bu məlumat da həqiqəti əks etdirmir. Araşdırmanın nəticəsinə görə, “Gəncə Şərab – 2” –nin istehsalı olan məhsulların tərkibindəki spirtin tərkibi normativə qətiyyən uyğun deyil. Məhz, buna görə zavodun istehsalı olan məhsullar aşağı qiymətə satılır.

Mütəxəssislər bildirirlər ki, spirtli içkilər istehsal edən müəssisələrdə təqvim üzrə yoxlamalar keçirilməlidir. İstehsal edilən məhsulların saxlanılma şəraiti, müddəti qeyd edilməlidir. Adı çəkilən müəssisədə əlavə olunan maddələrin istehsal tarixi qeyd edilmir, yararlılıq müddəti isə “məhdud deyil” – yazılır.

“Gəncə Şərab – 2” ASC-də istehsal edilən “məhsullar”ın yarlığındakı yazıların dili birbaşa dilimizə və qanunlarımıza hörmətsizlikdir. (Bu mövzuda gələcəkdə geniş danışacağıq).

Media olaraq vəzifəmiz baş verən olayları araşdırmaq, təhlil etmək və ictimailəşdirməkdən ibarətdir. Ümid edirik ki, “Gəncə Şərab – 2” ASC-də baş verən olaylara, pozuntulara əlaqədar təşkilatlar öz münasibətini bildirəcək, əməllərinə hüquqi qiymət verəcəklər. Görülən tədbirlər barədə yaxın günlərdə ictimaiyyəti məlumatlandıracağıq.